Rev 22 | MHL | STEP | Ne aria ensel nain-ke eka efa ofakowak. Eka nain enep anane ikowa-ke. Eka nain melin akena. Ne Mua Maneka ne Sipsip Muuka pokap ikemik nan urupep era-pa iwami owow goneiw iwiya. Pona oko-okaiwi nomokowa-ke arimep ikua. Nomokowa nain pun anane ikowa wiowa-ke. Ne makenarowa mokoma kuisow ten kuisow erup ariya. Nain feenap, siiwa kuisow kuisow makenarem-ikainon. Miiw mua sira kamenap nain nomokow ifa nain-pa wia saliwinon.

Revelation of John 22

1 Ne aria ensel nain-ke eka efa ofakowak. Eka nain enep anane ikowa-ke. Eka nain melin akena. Ne Mua Maneka ne Sipsip Muuka pokap ikemik nan urupep era-pa iwami owow goneiw iwiya. Pona oko-okaiwi nomokowa-ke arimep ikua. Nomokowa nain pun anane ikowa wiowa-ke. Ne makenarowa mokoma kuisow ten kuisow erup ariya. Nain feenap, siiwa kuisow kuisow makenarem-ikainon. Miiw mua sira kamenap nain nomokow ifa nain-pa wia saliwinon. 3 Owowa nain maa unowa eliw manekiw ikaiya, samora-ko me ikua. Mua Maneka Sipsip Muuka ikos pokimik nain owow gone-pariw ikaeya ona uuwow mua unowa o lotu onam-ikaikuan. 4 Wi o wameiya ikok miira wiar urufam-ikaikuan ne o unuma wiena ekima-pa wiar siisimep-puiwkin ikomakek. 5 Mua Maneka ona parina wiem-ikainon. Naapeya me kokomarem-ikainon. Ne arua parina ne ama pun uuwowa marew. Ne wi anane owow saria manekiw ikaikuan.

6 Ne aria ensel-ke efa maakek, “Opora fain makena-ke, ne maa ikoka makena imenarinon. Feenap, Mua Maneka aakisa ensel sesekeya ona uuwow teeria wia maakiya, lawisiw akena ikok maa-ko imenarinon. Mua Maneka eena ona profet Ewar Eliwa wieya maa ikoka imenarowa nain ariman wuam-ikemik nain.”

Yeesus nainiw ekapinon

7 Ne aria Yeesus-ke maek, “Nee, yo lawisiw akena nainiw ekapinen! Maa ikoka imenarowa nain parosifa-pa fan siisimep-puamik. Ne wi mua aakisa opora nain ookam-ikaimik nain eliw kemeluk!” Naap maek.

8 Aria yo Yon-ke, yena mokoka-pa kakeniw maa urufap miimap maiyem. Yo maa unowa nain urufap miimap ensel kepur onoma-pa keema muuna mikap lotu onekam naep onam. 9 Naeya os-ke efa maakek, “Yo lotu me efa one! Moram i unowiya uuwow epaskun-ke. Yo, nena, ne nena nomar unowa, wi profet ne wi mua parosifa fain urufap ookimik, i teeria nain-ke. Mua Maneka waisow lotu one!” Naap maek. 10 Ne kiiriw nainiw efa maakek, “Maa ikoka imenariya nain parosifa fan ikomakek nain me pipilime, moram maa unowa nain imenarowa epa mamaiya arikua. 11 Wi mua sira samora onam-ikaimik nain neek onam-ikauk, ne wi woos samora onaiya ikok sira-sira onam-ikaimik nain pun neek onam-ikauk. Sira eliwa onam-ikaimik nain pun naap akena onam-ikauk, ne mua kaken eliwa ikemik nain naap akena ikauk.” Naap maek.

12 Ne aria Yeesus-ke maek, “Nee, yo lawisiw akena nainiw ekapinen! Ekapemi ni iiriw sira kamenap onaman nain kakeniw nia kiripominen. 13 Aria maa unowa onoma yos-keriw ne murarowa weeserowa pun yos-keriw. Ne yo onom akena-pa ikip kapa-pa, ne onom akena-pa ikip iiwawun weeserowa-pa. 14 Ni mua niena mia suuwowa yasuwiwkin kia kirep ikua nain kemeleka. Ni nomokow makena nain eliw enep anane ikowen ne owow pika omopora-pa eliw ikiwemi owow neek ikowen. 15 Aria wi mua sira feenap nain owaruma-pa ikaikuan. Wi Mua Maneka opora wiar kapewimik nain, wi maikua onimik nain, wi uruw mia samora nain, mua wia ifakimimik nain, wi mua miira wia patirimik nain, wi opor wadola ne sira wadola kookalimik nain, wi unowiya pika owaruma-pa ikaikuan. 16 Aria yo Yeesus-ke ensel sesekamkun opor makena nefa ofakowiya nain yena teeria unowa nain wia maakem-miawe. Yo Dewit nembesir-ke. Ne yo mokoma Kuaidama-ke,” naap maek.

17 Aria Ewar Eliwa ne Sipsip Muuka emeria aawok nain ikos wi teeria nain wia farikuan, “Ni ekapeka oo!” Wi mua unowiya opora nain miimap wis pun naap mauk, “Ekapeka,” naap mauk. Aria ni kema enekarep-na eka fain enimeka, sesa marew. Eka enep anane eliwa ikowen. Ne kookalep-na enimeka.

18 Aria yo Yon-ke, yo opor kekanowa feenap niiyem. Ni maa ikoka imenarowa nain miimap opor oko maemi me anetireka. O mua opora fain anetirami opora oko mainon-na ikoka Mua Maneka-ke pina kiripominon. Sirirowa sira-sira parosifa fain maek nainiw kiripomami ane-kurumominon. 19 Ne mua-ko opora parosifa-pa fan ikua nain ara papako iirarinon-na Mua Maneka-ke o iirareya eliwa me ikainon ne owow eliwa-pa pun me ikainon. Naeya maa ele-eliwa eena parosifa fan siisimem nain makena me urufinon.

20 Mua opor unowa fain ariman wafurami makena maek nain-ke maek, “Maken akena! Yo nan ekapiyem!” Makena, Yiena Maneka Yeesus no ekape! 21 Ni Mua Maneka teeria yiena Maneka Yeesus-ke nia kemalep nia asipam-ikainon. Makena!